Киноны үйл явдал 1950 оны үеийн Ярославль хотод өрнөх бөгөөд эрүүгийн мөрдөн байцаагч асан Павел Хромов хилс хэргээр 8 жил өргөст торны цаана суужээ. Шоронгоос суллагдмагц Павел ямар ч гэм зэмгүй түүнийг ялд унагасан жинхэнэ эзний эрэлд зэхэж байлаа. Гэтэл бас түүний төрсөн эгч нь учир битүүлэг шалтгаанаар амиа алдсан нь эрлийн үзүүрийг улам ээдрээтэй болгож байна. Олон жил хүүгээ цөхөртөл хүлээсэн ээж нь охиныхоо цаг бусын үхлийг тэвчилгүй амьсгал хураажээ. Энэ бүгдийн цаана өөр хүчин зүйл байгааг нэгэнт ойлгосон Павел өөрийгөө ялд унагасан этгээдийг бус дээрмийн бүлэглэлийн эсрэг зогсохоор шийднэ. "Хар чоно” хэмээх дээрмийн бүлгийнхэн гэмт халдлага бүрийнхээ ул мөр болгон хэргийн газарт үхсэн хар чонын толгой үлдээсээр байлаа... "Хар чоно” - ын эсрэг орь ганцаар гар нүцгэн хүч тэнцвэргүй тулаанд хэрхэн тэмцэж буй адармаатай, ээдрээтэй бас онц сонирхолтой энэ киноны үйл явдлыг хүлээн авч үзээрэй.